Tue | Mar 26, 2019

Carolyn Cooper | NEPA plan a go mess up Discovery Bay

Published:Sunday | January 20, 2019 | 12:00 AM

 

CHAKA-CHAKA SPELLING

 

No mek no mistake tink seh di 'P' eena NEPA stand fi 'Protection'! A National Environment & Planning Agency. An it look like seh NEPA no plan fi protect no environment. Di way me seet, NEPA a help mash up di environment.

Look how di people dem eena Westmoreland did ha fi fight gainst NEPA after di agency gi leave an licence fi set up one gas factory an one block factory eena one residential community! Ashton Pitt im live side a weh dem did a plan fi put up di factory dem. An im put down im foot seh dem nah go dweet.

Im lucky im did have money fi tek one whole heap a dem go a court: Di attorney general, di Westmoreland Municipal Corporation, di Natural Resources Conservation Authority, di Town and Country Planning Authority, NEPA, an di two man dem weh did out fi build di factory dem, Andrew and Hubert Williams. Pitt win im case eena Supreme Court.

Gleaner tell di whole story pon January 6, 'Slap-down for NEPA'. Dem fi get nuff more slap. It look like seh di people dem eena Discovery Bay a go ha fi tek NEPA a court fi stop di Dolphin Cove from come mess up di bay. Last week, mi see one picture a di flatform weh set up fi start build di cage dem fi di poor dolphin dem.

 

WHO DI CAP FIT

 

NEPA nah listen to none a di people dem weh a tell dem seh no Dolphin Cove not suppose fi deh eena Discovery Bay. Hear weh NEPA a call di dolphin prison: "an ecotourism facility or attraction". Dat a no no 'ecotourism'. Dat a torture fi di dolphin dem.

Pon December 28, Gleaner put out one good-good column weh Erica Downer she write, 'The argument against a Dolphin Cove in Discovery Bay'. She gi chapter an verse. The last ting she seh: "The people of Jamaica neither want nor need this captive dolphin facility in Discovery Bay. The approval must be withdrawn or, at the very least, installation should be delayed by six months to allow for proper testing and impact studies, and consultations with stakeholders."

Di Jamaican people might a no want it. Roun' 8,680 smaddy a yard an abroad sign letter pon Change.org fi stop di dolphin racket. But smaddy a plan fi mek nuff money offa it. An it look like seh NEPA done plan fi help dat deh smaddy. Who di cap fit, mek dem wear it.

Den dis ya week, NEPA a kip meeting wid di people dem from Discovery Bay. Fi wa? After work done start pon di dolphin cage dem? NEPA tek people fi eedyat. Me waan know weh Prime Minister Andrew Holness a go do bout dat de letter weh dem whole heap a people send im fi stop di dolphin prison. Im better stand up fi principle. Or im might a lose di work.

 

PRAPA-PRAPA SPELIN

 

No mek no mistiek tingk se di 'P' iina NEPA stan fi 'Protection'! A National Environment & Planning Agency. An it luk laik se NEPA no plan fi protek no envairanment. Di wie mii siit, NEPA a elp mash op di envairanment.

Luk ou di piipl dem iina Westmoreland did a fi fait gens NEPA aafta di agency gi liiv an laisn fi set op wan gyas fakchri an wan blak fakchri iina wan rezidenshal komyuuniti! Ashton Pitt im liv said a we dem did a plan fi put op di fakchri dem. An im pudong im fut se dem naa go dwiit.

Im loki im did av moni fi tek wan uol iip a dem go a kuort: Di Attorney General, di Westmoreland Municipal Corporation, di Natural Resources Conservation Authority, di Town and Country Planning Authority, NEPA, an di tuu man dem we did out fi bil di fakchri dem, Andrew and Hubert Williams. Pitt win im kies iina Supreme Court.

Gleaner tel di uol stuori pan Janieri 6, 'Slap-down for NEPA'. Dem fi get nof muor slap. It luk laik se di piipl dem iina Discovery Bay a go a fi tek NEPA a kuort fi stap di Dolphin Cove fram kom mes op di bie. Laas wiik, mi si wan pikcha a di flatfaam we set op fi staat bil di kiej dem fi di puor dalfin dem.

 

UU DI KYAP FIT

 

NEPA naa lisn tu non a di piipl dem we a tel dem se no Dolphin Cove nat supuoz fi de iina Discovery Bay. Ier we NEPA a kaal di dalfin prizn: "an ecotourism facility or attraction". Dat a no no 'ecotourism'. Dat a taacha fi di dalfin dem.

Pan Disemba 28, Gleaner put out wan gud-gud kalam we Erica Downer shii rait, 'The argument against a Dolphin Cove in Discovery Bay'. Shi gi chapta an vors. The last ting shi se: "The people of Jamaica neither want nor need this captive dolphin facility in Discovery Bay. The approval must be withdrawn or, at the very least, installation should be delayed by six months to allow for proper testing and impact studies, and consultations with stakeholders."

Di Jamiekan piipl mait a no waahnt it. Roun 18,680 smadi a yaad an abraad sain leta pan Change.org fi stap di dalfin rakit. Bot smadi a plan fi mek nof moni aafa it. An it luk laik se NEPA don plan fi elp dat de smadi. Uu di kyap fit, mek dem wier it.

Den dis ya wiik, NEPA a kip miitn wid di piipl dem fram Discovery Bay. Fi wa? Aafta wok don staat pan di dalfin kiej dem? NEPA tek piipl fi iidyat. Mii waahn nuo we Praim Minista Andrew Holness a go du bout dat de leta we dem uol iip a piipl sen im fi stap di dalfin prizn. Im beta stan op fi prinsipl. Ar im mait a luuz di wok.

- Carolyn Cooper, PhD, is a specialist on culture and development. Email feedback to columns@gleanerjm.com and karokupa@gmail.com.